“Хлеб-соль “

На ручніках, расшытых пеўнямі,
хлеб-соль падносім да гасцей,
вядзем за стол, каўшамі пеннымі
частуем брагай пагусцей.
I не хаваем - дзе падзенешся? -
сваіх пачэсных мазалёў.
А трэба — крошкаю падзелішся:
лепш сто сяброў, чым сто рублёў.

Сцяпан Гаўрусёў

    27 красавіка пачаліся дні беларускай культуры, якія штогод ладзіць беларускае культурна-асветніцкае таварыства “Уздым”. Дні адкрыла свята беларускай нацыянальнай кухні “І ў клёцак ёсць душа”. Назву  свята мы падглядзелі ў нашых сяброў з Беларусі.Беларуская кухня часта ўспрымаецца гасцямі, як стравы з бульбы з бульбай і пад бульбяным соўсам. Але нацыянальныя стравы разнастайныя і каларытныя. Беларуская кухня мае даўнюю гісторыю. Кулінарныя прыхільнасці беларусаў захоўваюць і сёння нацыянальную самабытнасць. Гаспадыні ўжываюць бабуліны рэцэпты.

   Беларуская кухня – гэта спадчына, якую пакінулі нашы продкі, частка матэрыяльнай культуры. Яна складалася на працягу шматлікіх вякоў і мае сваю гісторыю, традыцыі, асаблівасці, прыкметы, нормы, правілы і ўнікальнасць. Гэта неабходна захаваць, зберагчы і данесці да будучага пакалення. Таму і свята беларускай кухні стала традыцыйным мерапрыемствам, якое штогод ладзіць таварыства “Уздым”.Шаноўнымі гасцямі мерапрыемства былі віцэ-мэр г. Даўгаўпілса А. Васільеў, Генеральны консул РБ у Даўгаўпілсе І. Лапуць. З прывітальным словам выступіла старшыня беларускага таварыства “Уздым” Лілія Воранава. З нагоды  свята нас віншаваў прадстаўнік яўрэйскай абшчыны Міхаіл Курыцкій. Намеснік старшыні таварыства Людміла Сінякова пазнаёміла гасцей з працай па падрыхтоўцы новага друкаванага выдання аб дзейнасці арганізацыі.

   Галоўнай гаспадыняй свята беларускай кухні ўжо шмат гадоў з’яўляецца Вольга Паўловіч. Вольга – адна з заснавальнікаў таварыства “Уздым”, арганізатар і настаўніца беларускай нядзельнай школы “Вясёлка”, шмат гадоў  займае пасаду члена праўлення таварыства.

   Дзякуючы намаганням нашых гаспадынь: Леангіны Муйжніецэ, Зінаіды Сіліня, Ліліі Воранавай, Таццяны Рудэнка, Рэгіны Высоцкай, святочны стол быў багата накрыты.

   Тут былі розныя прысмакі: стравы з бульбы, мяса, агародніны, розныя бліны, пірагі, булачкі і пячэнне, салёныя агурочкі і грыбы, квашаная рознымі спосабамі капуста. Госці частаваліся дранікамі, клёцкамі, панцаковай кашай, бульбяной бабкай.  А пра клёцкі шмат было размовы! На сярэдзіне стала красаваўся  велікодны куліч,  таму што свята праходзіла напрыканцы  Вялікдня.

   Вельмі цікавую бяседу пра стравы вела Вольга Паўловіч. Успомнілі пра калядныя і велікодныя стравы, вялася размова пра ежу падчас пастоў. Кожны расказаў пра сваю самую любімую страву з дзяцінства. Жанчыны дзяліліся рацэптамі. Адгадвалі загадкі, жартавалі, спявалі разам песні, танцавалі. Слухалі песні ў выкананні Рыгора Старавойтава, Жанны Слядзеўскай, трыа з г. Ліваны – Алены і Аляксандра Усцінавых, Анастасіі Кізэрнэ, Зінаіды Сіліні. Свае вершы чыталі Станіслаў Валодзька і Тамара Дарафеева.  

   На вядучага мерапрыемства ўскладаецца вялікая адказнасць, бо менавіта ён павінен данесці да гасцей усю значную інфармацыю і дабіцца выканання пастаўленых задач на мерапрыемстве. З гэтым добра справілася вядучая нашага мерапрыемства Валянціна Ліпінская. Яна праводзіла актыўныя забаўляльныя гульні, даглядала гасцей, каардынавала музычнае суправаджэнне.

Людміла Сінякова

намеснік старшыні таварыства “Уздым”