12 студзеня 2019 года беларускае таварыства "Прамень" у Рызе і яго ансамбль «Надзея» адзначылі 30-годдзе сваёй дзейнасці. Даўгаўпілскае беларускае культурна-асветніцкае таварыства «Уздым» адправілася ў сталіцу, каб павіншаваць партнёраў.

У Залатой зале Латышскага таварыства ў Рызе старшыня «Праменя» Алена Лазарава прымала віншаванні ад прадстаўнікоў Пасольства Беларусі ў Латвіі, Латвійскай Праваслаўнай Царквы, Міністэрства культуры Латвіі, беларускіх таварыстваў з розных гарадоў Латвіі.

Ад Даўгаўпілскага беларускага таварыства «Уздым» гаспадароў свята павіншавалі член праўлення «Уздыма» Валерый Амбросаў і член Саюза пісьменнікаў Беларусі Станіслаў Валодзька. Словы ўдзячнасці былі адрасаваны і тым, хто ў розны час узначальваў «Прамень» – Алесю Карповічу, Міколу Бураму і Валянціне Піскуновай, якая ўжо шмат гадоў з’яўляецца кіраўніком Саюза беларусаў Латвіі.

Прысутныя мелі магчымасць паглядзець канцэрт, у якім прымалі ўдзел беларускі ансамбль «Надзея», створаны таварыствам «Прамень», салістка Людміла Сінкевіч, інструментальны дуэт – Дар’я Грышына и Іна Райхманэ. Упрыгожаннем свята стала выступленне фольк-шоу балета «Альянс» з Бабруйска.

У канцэрце прагучала нямала беларускіх народных і аўтарскіх песень, сярод якіх – песня «Ручнік» на словы Станіслава Валодзькі (музыка Альберта Белуся) і перакладзеная ім на беларускую мову папулярная песня «Белая Русь».

Варта адзначыць, што таварыства «Прамень» з’яўляецца першым афіцыйна зарэгістраваным беларускім таварыствам Латвіі (у 1993  годзе). Неўзабаве яго прыкладу паследаваў «Уздым». І з самага пачатку іх дзейнасці гэтыя таварыствы звязвае моцная дружба і плённае супрацоўніцтва.

Станіслаў Валодзька прысвяціў юбілярам верш:

                                         ТАВАРЫСТВУ “ПРАМЕНЬ”

                                                 НА 30-ГОДДЗЕ

                                        Як распачаўся новы дзень, –

                                        Успыхнуў сонечны “Прамень”,

                                        І ў суайчыннікаў маіх

                                        Натхнення творчага агмень

                                        Стаў разгарацца,

                                        Й палілісь,

                                        Як у мінуўшчыне калісь,

                                        На роднай мове песні тут,

                                        Ўслаўляючы бацькоўскі кут.

                                        І вам пашчасціла “Надзею”

                                        Стварыць – таленавіты гурт!

                                        Ў пашане сталі тут абрады:

                                        “Дзяды”, “Купалле” і “Каляды”.

                                        І весткі добрыя па свеце

                                        Разнесліся ў “Прамень-газеце”...

                                        Вось так і ў будучынь ляці,

                                        “Прамень”, і ярка так свяці

                                        Нашчадкам нашым, каб яны

                                        Свае вытокі й карані

                                        Маглі таксама шанаваць, –

                                        Любоўю сэрцы саграваць…

                                              Станіслаў Валодзька

Аўтар: «Уздым»

Фота: прэс-фота